مؤامرة

نفسي بقى شبابنا الحبوب يبطل نظرية المؤامرة اللي واكلة دماغه دي.. البهائيين بـيتآمروا عالمصريين.. اليهود بـيتآمروا على شباب المسلمين.. الامريكان بـيتآمروا على دين أم شباب العرب! طب محدش بـيتآمر على ماليزيا ولا الصين ليه؟! على فكرة أنا مسلم بس حطق من الطريقة اللي المسلمين في مصر بيعاملوا بيها غير المسلمين.. وكل ملة ليها حجة شكل.. المسيحيين دول عايزين حقوق أكتر من اللي واخدينها.. البهائيين دول دين مش سماوي وعاملين مؤامرة صهيونية على مصر.. اليهود (أيام زمان) مش مصريين وبيتجسسوا عالمصريين.. طب إيه مشكلتك لما تشوف اللي يريح اخوك المسيحي وتعمله بدل ماتكتم على دين أمه؟ والبهائي ده واحد اتولد لقى نفسه بهائي.. زي ما أنت لقيت نفسك مسلم.. كلها صدف وحياتك.. وبعدين حكاية دين مش سماوي دي سيبك منها.. الإسلام برضه دين مش سماوي عند المسيحيين في امريكا وأوروبا الوحشين.. لو مش عجبك ماتروحش تقعد عندهم وتبني جوامع وتصرخ لما حد فيهم يضطهدك ..
يا جماعة والله الإسلام ومصر أكبر من كده بكتير.. ماتصغروهمش بعمايلكو دي.

مسلم ولا مسيحي ولا بوذي؟

:ارجوكم يا مسلمين تحاولوا تجاوبوا على الاسئلة دي

تعمل إيه  لو كنت بهائي أو مسيحي بالميلاد؟ مااحتمال إنك تفضل بهائي أو مسيحي وما احتمال إنك تتحول لدين تاني.. الإسلام مثلا؟ في الغالب انك كنت حتفضل على دينك.. في الغالب انك مكنتش حاتبحث وتتعمق في الاديان التانية وحاتكتفي بالمعرفة السطحية عن الإسلام زي ما أنت مكتفي دلوقتي بالمعرفة السطحية عن الاديان التانية .

عمرك فكرت إنت أحسن في إيه كمسلم عن المسيحي أو البهائي أو البوذي؟ الاغلب (مع بعض الاستثناء) أن حقيقة انك مسلم هي مجرد صدفة. إنت مسلم لانك اتولدت في عائلة مسلمة مش أكتر.

دلوقتي حُط كلمة مسيحي أو بهائي بدل كلمة مسلم واقرأ من تاني .. معظمنا على دين عيلته وحيفضل على نفس الدين مهما حصل.. مسلم أو مسيحي أو بوذي.. معظمنا بيتعامل مع الدين زي مابيشجع ناديه..زي مايكون بننتمي لقبائل مش أديان.. من ليس منا فهو علينا..

حاول تطلع من الصندوق اللي حابس نفسك فيه وبص كده من فوق وإنت حاتفهم أنا باقوللك إيه

الحاج حسني وولده

أنا حاجيب من الآخر! مصر دي فيها شباب عنده رؤية وبعد نظر أكتر ميت مرة من الحاج حسني وولده.. بس نعمل إيه؟ الحاج محزمها ومتبت فيها ومش عايز يحطت نظام ديموقراطي يدي البلد للاكفاء.. كله عشان خاطر المحروس عين أمه! المشكلة دلوقتي إن فيه كتاب وصحفيين كنا بنثق فيهم بدأوا يغيروا جلدهم ويقولوا وماله المحروس؟ هو ذنبه يعني إنه ابن الحاج حسني؟ ماتدوله فرصته يا جماعة زي ما كل شباب مصر واخدين فرصتهم. وفيه ناس تانية يقولولك: احنا خلاص زهقنا بقى من موضوع التوريث ده.. خلي المحروس يمسكها ونشوف حيعمل إيه.. يمكن يطلع أحسن من ابوه! زي مايكون المحروس لسة ممسكهاش بقاله سنين!

الوعد الرئاسي

يا جماعة السيد الرئيس بنفسه نفى ان يتم أي توريث في مصر.. وقالها بصراحة.. مصر مش زي سوريا.. ورجع جمال ونفى إنه ينوي الترشح للرئاسة.. أنا بقى مصدقهم.. عشان رئيس مصر وابنه مش ممكن يبقوا كدابين.. أو محتالين.. أو بيلحسوا وعودهم.. وأكيد مش بـيتآمروا ضد مصلحة البلد والشعب. مش كده ولا ايييييه؟ 

السلسلة المباركة

يا جماعة خلينا نفكر مع بعض بهدوء في موضوع جمال مبارك.. الراجل دة اتربي في بيت رئاسي.. وقبل كده كان ابن نائب الرئيس.. وقبل كده كان ابن قائد الدفاع الجوي.. يعني شرب سياسة من صغره.. وكمان جمال شبعان فلوس ومش حيبص لفلوس البلد.. فيها إيه بقى لما يحكم بعد والده؟! وعلى فكرة.. أنا من دلوقتي أؤيد ترشيح ابن جمال مبارك وحفيده كمان.. ماهو برضه حيبقى ابن رئيس.. ومتربي في بيت رئاسي.. وإن شاء الله فلوس جمال تكفيه مايحتاجش يبص لفلوس البلد ..