الأجوف

الأجوف يقول: أنا مش أعظم راجل في مصر.

البيضة قبل الفرخة؟ رد على مجدي الجلاد في المصري اليوم

هي البيضة قبل الفرخة ولا الفرخة قبل البيضة؟ لما الناس تبتدي تصحى وتفكر في رئيس جديد تقولولهم مش مهم الشخص المهم الدستور.. خلليني معاك للآخر.. هو مين اللي حيغير الدستور ويطبق العدل؟ مجلس الشعب؟ ما أنت عارف.. حسني أو جمال؟ ما أنت عارف برضه.. الدستور عندنا بيتغير بطريقتين مفيش غيرهم.. بضغط من أمريكا.. أو بضابط جيش ينط علينا من فوق.. يبقى الحل الوحيد إننا ندور على رئيسنا بنفسنا..قائد يغير مش موظف يدير.. دم جديد مش فكر جديد.. وساعتها ممكن نشترط عليه ونحط السيستم اللي كلنا عاوزينه..

اصطباحة بلال فضل 6 سبتمبر 2009

منقول بالنص من اصطباحة بلال فضل في المصري اليوم:

سين سؤال: لماذا لا يطلع الرئيس مبارك على الشعب المصرى من ثنيات أجهزة إعلامه الحكومية لكى يعلن صراحة أن هناك نية رسمية باتت واضحة وضوح الشمس لنقل السلطة إلى نجله جمال فى موعد لا يعلمه إلا سيادة الرئيس؟
جيم جواب: لأن الرئيس مبارك لا يعتبر أنه مُطَالَبٌ أساسا بأن يوضح للشعب المصرى نواياه أو مواقفه، فهذا الشعب لم يحاسبه على شىء منذ أن تولى حكمه، ولن يحاسبه على شىء عندما ينتهى حكمه، لأنه لا يعلم أساسا متى ينتهى حكمه، ومثلما لم يشغل سيادة الرئيس نفسه فى ماضى الأيام بأن يفسر لشعبه لماذا قرر أن يظل فى الحكم ست فترات رئاسية وهو عكس ما وعد به بعد توليه الحكم وقاله على الملأ،
فهو لن يشغل نفسه بأن يفسر لشعبه كيف تغيرت لهجته من نفى التوريث بتاتا وصراحة إلى أن يمتنع عن نفيه فى حواره التليفزيونى مع المذيع الأمريكى تشارلى روز قبل أسابيع قائلا إن «جمال لم يفاتحه بعد فى موضوع التوريث».
لن يسأل أحد فى هذه البلاد الرئيس مبارك بأى حق يصطحب ابنه كبار مسؤولى الدولة ليصحبوه فى زيارات للقرى التى يسمونها بالأكثر فقرا، لأن أحدا لم يسأل أساسا فى عهد من أصبحت هذه القرى أكثر فقرا. لن يسأل أحد فى هذه البلاد الرئيس مبارك بأى حق يرتدى شباب ينتمون لحزبه الحاكم تى شيرتات مكتوبا عليها «طلائع جمال مبارك» دون أن يظهر أحد ليعتذر عن مثل هذه السفاهة،
لأن أحدا لم يسأل الرئيس كيف سمح قبل ذلك بعشرات الأوبريتات الغنائية التى أنفقت عليها ملايين الجنيهات لكى تتغنى بإنجازاته وعظمته، وكأنه حرام على هذا البلد أن يكون متحضرا ويبرأ من نسبته لحاكم أيا كان.
اليوم للأسف تتواصل مهزلة التوريث وتكتسب أبعادا أخطر، ها هى اليوم تخترق مناهج التعليم التى امتلك بعض مسؤولى التعليم الوقاحة لتغييرها من أجل تسميم عقول الأجيال الجديدة، على مرأى ومسمع من الجميع.
اليوم فى مقرر اللغة العربية الجديد للصف الثانى الإعدادى تتم إضافة دروس موجهة بعنوان (أطفال صنعوا التاريخ) تقدم أمثلة من حقب تاريخية مختلفة لتأكيد فكرة أن الولد العظيم دائما صنيعة أبيه العظيم، وأن كل حاكم عظيم قادر على أن يهدى شعبه ملكا آخر عظيما يمثل امتدادا له،
فى درس (الصقر الذهبى) يحكى الكتاب للطلاب عن الملك سيتى الأول الذى راقت له فكرة تتويج ولده رمسيس فى عيد ميلاده التاسع، ومن يومها راح يعلم ابنه كيف يكون حاكما،
فى درس (أمنية تحققت) يقدمون للطلاب نموذجا آخر للحاكم أحمد بن طولون وولده خمارويه، وكيف يقول أكبر علماء الدين القاضى ابن قتيبة للحاكم ابن طولون «يا مولاى لقد ولد خمارويه لكى يكون قائدا لا يشق له غبار»، فيبتسم ابن طولون ويقول للقاضى «إننى أفكر فى أمر ولاية العهد يا ابن قتيبة، سوف أجعلها لخمارويه ويجب أن تكون مع ولدى».
ياخسارة يا مصر، هل هذه آخرة المتمّة؟، هل هذا ما قامت ثورة يوليو من أجله؟، هل هذا ما حارب من أجله جنودك فى حرب أكتوبر؟، هل هذا ما حلم به من أجله ملايين الشغيلة والكادحين والمثقفين والعلماء والفنانين؟، هل صار التوريث المشروع القومى لمصر؟،
ما هى الكرامة التى بينها جمال مبارك منذ اعتلى خشبة المسرح السياسى لكى تسخر إمكانيات البلاد وتتغير مناهج تعليمها من أجل تحقيق أحلامه السياسية؟، هل يريد الرئيس مبارك أن يخلد نفسه فى كتب التاريخ بوصفه الحاكم الذى سمح بأن يتعلم نجله الحكم فى المصريين؟،
لماذا لا يعتذر الرئيس مبارك للمصريين عن الجملة المؤسفة التى قيلت فى حوار تشارلى روز، وعن هذا العبث المزرى بمناهج التعليم؟، لماذا لا يقول لشعبه إنه سيلتزم بوعده أنه لن يكون هناك توريث فى مصر،
وأن أهم ما سيعمل عليه فى الفترة القادمة هو تحقيق إصلاح دستورى وسياسى حقيقى يمكن المصريين من تقرير مصيرهم بأنفسهم كأى شعب متحضر ليس من حق أحد أن يمارس وصايته عليه ويدعى أنه يعرف مصلحته أكثر منه؟.
على العبد أن يسأل وليس عليه أن يدرك الجواب.

ديجا فو

سلي صيامك وطلع سبع فروق بين الاصل والصورة

مجدي الجلاد وبورات

عبدالله كمال وميكي

ماجدة زكي وفيونا

علي الشريف وشرك

حكاية الخنازير والحاكم الكبير

كان فيه بلاد بعيدة فيها ناس عايشين.. مش سعداء قوي بس عايشين.. بلدهم مش نضيفة قوي بس أهو.. عايشين.. وكان معاهم شوية خنازير عايشين على جنب وفي حالهم.. جه مرض مميت اسمه انفلونزا الخنازير.. سلطان البلد كان خلقه ضيق فأمر بقتل كل خنازير البلد رغم كل التحذيرات إن المرض دة بـينتقل عن طريق الإنسان مش الخنزير.. كبير الوزراء وشاهبندر الاطباء لم يجرؤا على مراجعة السلطان أبوخلق ضيق.. وفعلا ماتت كل الخنازير بأمر الحاكم الكبير.. فاتت شهور والزبالة اتكومت في الشوارع.. والناس اكتشفوا فجأة إن معندهمش أي وسيلة للتخلص من الزبالة غير الخنازير.. الشتاء جه وجت معاه انفلونزا الخنازير أشد من الأول بسبب البرد وكمان مناعة الناس كانت أقل بكتير من زمان بسبب كتر الزبالة.. و ............... وتوتة توتة خلصت الحدوتة

مؤامرة

نفسي بقى شبابنا الحبوب يبطل نظرية المؤامرة اللي واكلة دماغه دي.. البهائيين بـيتآمروا عالمصريين.. اليهود بـيتآمروا على شباب المسلمين.. الامريكان بـيتآمروا على دين أم شباب العرب! طب محدش بـيتآمر على ماليزيا ولا الصين ليه؟! على فكرة أنا مسلم بس حطق من الطريقة اللي المسلمين في مصر بيعاملوا بيها غير المسلمين.. وكل ملة ليها حجة شكل.. المسيحيين دول عايزين حقوق أكتر من اللي واخدينها.. البهائيين دول دين مش سماوي وعاملين مؤامرة صهيونية على مصر.. اليهود (أيام زمان) مش مصريين وبيتجسسوا عالمصريين.. طب إيه مشكلتك لما تشوف اللي يريح اخوك المسيحي وتعمله بدل ماتكتم على دين أمه؟ والبهائي ده واحد اتولد لقى نفسه بهائي.. زي ما أنت لقيت نفسك مسلم.. كلها صدف وحياتك.. وبعدين حكاية دين مش سماوي دي سيبك منها.. الإسلام برضه دين مش سماوي عند المسيحيين في امريكا وأوروبا الوحشين.. لو مش عجبك ماتروحش تقعد عندهم وتبني جوامع وتصرخ لما حد فيهم يضطهدك ..
يا جماعة والله الإسلام ومصر أكبر من كده بكتير.. ماتصغروهمش بعمايلكو دي.

مسلم ولا مسيحي ولا بوذي؟

:ارجوكم يا مسلمين تحاولوا تجاوبوا على الاسئلة دي

تعمل إيه  لو كنت بهائي أو مسيحي بالميلاد؟ مااحتمال إنك تفضل بهائي أو مسيحي وما احتمال إنك تتحول لدين تاني.. الإسلام مثلا؟ في الغالب انك كنت حتفضل على دينك.. في الغالب انك مكنتش حاتبحث وتتعمق في الاديان التانية وحاتكتفي بالمعرفة السطحية عن الإسلام زي ما أنت مكتفي دلوقتي بالمعرفة السطحية عن الاديان التانية .

عمرك فكرت إنت أحسن في إيه كمسلم عن المسيحي أو البهائي أو البوذي؟ الاغلب (مع بعض الاستثناء) أن حقيقة انك مسلم هي مجرد صدفة. إنت مسلم لانك اتولدت في عائلة مسلمة مش أكتر.

دلوقتي حُط كلمة مسيحي أو بهائي بدل كلمة مسلم واقرأ من تاني .. معظمنا على دين عيلته وحيفضل على نفس الدين مهما حصل.. مسلم أو مسيحي أو بوذي.. معظمنا بيتعامل مع الدين زي مابيشجع ناديه..زي مايكون بننتمي لقبائل مش أديان.. من ليس منا فهو علينا..

حاول تطلع من الصندوق اللي حابس نفسك فيه وبص كده من فوق وإنت حاتفهم أنا باقوللك إيه

الحاج حسني وولده

أنا حاجيب من الآخر! مصر دي فيها شباب عنده رؤية وبعد نظر أكتر ميت مرة من الحاج حسني وولده.. بس نعمل إيه؟ الحاج محزمها ومتبت فيها ومش عايز يحطت نظام ديموقراطي يدي البلد للاكفاء.. كله عشان خاطر المحروس عين أمه! المشكلة دلوقتي إن فيه كتاب وصحفيين كنا بنثق فيهم بدأوا يغيروا جلدهم ويقولوا وماله المحروس؟ هو ذنبه يعني إنه ابن الحاج حسني؟ ماتدوله فرصته يا جماعة زي ما كل شباب مصر واخدين فرصتهم. وفيه ناس تانية يقولولك: احنا خلاص زهقنا بقى من موضوع التوريث ده.. خلي المحروس يمسكها ونشوف حيعمل إيه.. يمكن يطلع أحسن من ابوه! زي مايكون المحروس لسة ممسكهاش بقاله سنين!

الوعد الرئاسي

يا جماعة السيد الرئيس بنفسه نفى ان يتم أي توريث في مصر.. وقالها بصراحة.. مصر مش زي سوريا.. ورجع جمال ونفى إنه ينوي الترشح للرئاسة.. أنا بقى مصدقهم.. عشان رئيس مصر وابنه مش ممكن يبقوا كدابين.. أو محتالين.. أو بيلحسوا وعودهم.. وأكيد مش بـيتآمروا ضد مصلحة البلد والشعب. مش كده ولا ايييييه؟ 

السلسلة المباركة

يا جماعة خلينا نفكر مع بعض بهدوء في موضوع جمال مبارك.. الراجل دة اتربي في بيت رئاسي.. وقبل كده كان ابن نائب الرئيس.. وقبل كده كان ابن قائد الدفاع الجوي.. يعني شرب سياسة من صغره.. وكمان جمال شبعان فلوس ومش حيبص لفلوس البلد.. فيها إيه بقى لما يحكم بعد والده؟! وعلى فكرة.. أنا من دلوقتي أؤيد ترشيح ابن جمال مبارك وحفيده كمان.. ماهو برضه حيبقى ابن رئيس.. ومتربي في بيت رئاسي.. وإن شاء الله فلوس جمال تكفيه مايحتاجش يبص لفلوس البلد ..